MUTRIKUKO ERRALDOI ETA BURUHANDIEN KONPARTSA
AKERBELTZ BADATOR!
MUTRIKUKO ERRALDOIEN MINIATURAK
Mutrikuko Erraldoi eta Buruhandien konpartsak herriko erraldoien miniaturak egiteko urtetan izandako ametsa, egia bihurtu da.
Hainbat urtetan aukera ezberdinak aztertu ondoren, Mutrikuko Udalak 2023ko abenduan erraldoien miniaturak egiteko beharrezko inbertsioa bere gain hartzea erabaki zuen. Urtebete pasatu ondoren, hemen dira Akerbeltz eta Mari.
Hauek eskuratzeko abenduaren 14tik aurrera Agerretxo zapata dendan 20€-ren truke erosteko aukera izango duzue.Norbaitek honezkero pentsatuko zuenez, non daude Sorgina eta Urtzi? Egon zaitezte lasai, salmenta hauekin berreskuratuko den dirua baliatuko baita hurrengo urteetan falta diren miniaturak egiteko.
Ez galdu aukera, hegan egingo baitute.
AKERBELTZ EUROPAN ZEHAR
Akerbeltz Italian zehar dabil oporretan. Pettigoat Government proiektuko arduradunek aukeratua izan zen 2024ko Bienaleko Arte erakustaldian parte hartzeko. Alpe Italiarretako laku izoztuetan dantza egin ondoren Veneziako uretara iritsi da eta laster erakusketa baten parte hartuko du Europako beste zazpi erraldoirekin batera. Azarora arte egongo da bidaian.